جديد ٽيڪنالاجي کانسواءِ ترقي ممڪن نه آهي، سوشل ميڊيا جي ذريعي ڪوڙيون ۽ جعلي خبرون ڦهلايون وڃن ٿيون: عطاءُ الله تارڙ

اسلام آباد – 04 – سيپٽمبر (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته جديد ٽيڪنالاجي کانسواءِ ترقي ممڪن نه آهي، سوشل ميڊيا جي ذريعي ڪوڙيون ۽ جعلي خبرون ڦهلايون وڃن ٿيون، حڪومت ٽيڪنالاجي جي حوالي سان ڪيترائي قدم کنيا آهن. اها ڳالهه هن مقامي هوٽل ۾ ٽيڪ ويلي جي اهتمام هيٺ ”ڊيجيٽل صحافت….. پاڪستاني صحافين جي لاءِ تربيتي پروگرام“ کي خطاب ڪندي چئي. اطلاعات واري وفاقي وزير عطاءُ الله تارڙ چيو ته گذريل ڪيترن ئي ڏهاڪن کان ڊيجيٽل اسپيس تمام گهڻي ترقي ڪئي آهي، حڪومت جديد ٽيڪنالاجي جي حوالي سان تمام گهڻو ڪم ڪيو آهي. هن چيو ته جڏهن محمد شهباز شريف پنجاب جو وڏو وزير هو، ته ان وقت به مون ساڻس گڏ ڪم ڪيو، اسان کي ادراڪ هو ته ٽيڪنالاجي کانسواءِ اسان ترقي نٿا ڪري سگهون. هن چيو ته اسان پاڪستان جو پهريون لينڊ رڪارڊ انفارميشن سسٽم قائم ڪيو ۽ پوري لينڊ روينيو سسٽم کي ڊيجيٽلائيزڊ ڪيو جيڪو برطانوي راڄ جي وقت کان رجسٽرن تي ڪم ڪري رهيو هو، ڏهاڪن کان ان نظام کي ڪنهن تبديل ڪرڻ جي ڪوشش نه ڪئي هئي، اسان ان چئلينج کي قبول ڪيو، اهو اسان ڪم نه هو، اسان پهرين لينڊ رڪارڊ سسٽم کي ڊيجيٽل ڊومين ۾ داخل ڪيو ۽ ان کي روايتي نظام کان ڊيجيٽل نظام ۾ ڪاميابي سان تبديل ڪيو. وفاقي وزير چيو ته اسان پاڪستان جو پهريون سيف سٽي پراجيڪٽ پڻ مڪمل ڪيو جنهن جو مقصد ڏوهن سميت دهشتگردي تي ضابطو آڻڻ هو. هن چيو ته جيڪڏهن اسان وقت سان گڏ پاڻ کي نه بدلايو ته وقت اسان کي بدلائي ڇڏيندو. هن چيو ته ڊيجيٽل دور ۾ جتي معلومات جي تصديق ضروري عمل آهي، اتي اسان کي دنيا کي حقيقت کان آگاهه ڪرڻو پوندو. هن چيو ته اخبارن ۾ ايڊيٽوريل ڪنٽرول جو نظام موجود آهي پر ڊيجيٽل ڊومين ۾ بدقسمتي سان اسان وٽ ڪو اهڙو طريقيڪار موجود نه آهي جتي معلومات جي تصديق ڪري سگهجي. هن چيو ته جعلي خبرون معيشت کي نقصان پهچائين ٿيون، هڪ ڪوڙي ۽ غلط خبر ملڪ جي تشخص کي متاثر ڪري سگهي ٿي. هن چيو ته اسان کي صحافين ۽ ڊيجيٽل فري لانسرز کي مناسب مهارتن سان ليس ڪرڻ جي ضرورت آهي ته جيئن اهي هن ملڪ جا سفير بڻجي سگهن ۽ دنيا ۾ پاڪستان جو مثبت اميج اجاگر ڪري سگهن. وفاقي وزير چيو ته هن جنهن تڪ مان چونڊ وڙهي اهو عام روايتي تڪ نه آهي، ان تڪ ۾ 70 هزار اقليتي ووٽرز آهن ۽ جڏهن ان تڪ جي اقليتي ووٽرز سان رابطو ڪيو ويو ته ائين محسوس ٿيو ته اهي پاڻ کي غيرمحفوظ سمجهندا هجن. هن چيو ته ڪجهه مذهبي انتهاپسند غلط فهميون پيدا ڪن ٿا، اهڙا ماڻهو جيڪي غلط معلومات ڦهلائين ٿا اهي ڪڏهن به اسان جا دوست نٿا ٿي سگهن. هن چيو ته اطلاعات واري وزارت ۾ فيڪٽ چيڪ جو نظام گذريل ٻن سالن کان ڪم ڪري رهيو آهي، اسان ڊيجيٽل پليٽ فارمز تي موجود آهيون، فيڪٽ چيڪ جي ذريعي ان نظام تحت سوشل ميڊيا تي ايندڙ خبرن تي نظر رکي وڃي ٿي، جعلي خبرن جي نشاندهي ڪئي وڃي ٿي ۽ عوام کي ٻڌايو وڃي ٿو ته فلاڻي معلومات غلط يا جعلي آهي. هن چيو ته صحافين کي تربيت جي فراهمي جي حوالي سان ٽيڪ ويلي ۽ گوگل تمام سٺو قدم کنيو آهي، مون کي يقين آهي ته اها تربيت اسان جي معاشري جي تعمير ۾ اهم ڪردار ادا ڪندي. هن چيو ته معاشري ۾ انتشار ڦهلائڻ جي لاءِ سوشل ميڊيا جو استعمال ڪيو وڃي ٿو، سوشل ميڊيا جي ذريعي ڪوڙيون خبرون ڦهلايون وڃن ٿيون. انتهاپسند عنصر به سوشل ميڊيا جو استعمال ڪن ٿا. گوگل ۽ ٽيڪ ويلي جي صحافين کي تربيت جي فراهمي جي قدم کي ساراهيندي پنهنجي هر ممڪن تعاون جو يقين ڏياريندي وفاقي وزير چيو ته صحافين جي مناسب تربيت سان اسان هڪ اهڙو ماحول جوڙي سگهنداسين جو اسان پنهنجي عوام جي وچ ۾ هم آهنگي کي فروغ ڏئي سگهون. هن چيو ته اسان کي ڊيجيٽل اسپيس جي مثبت استعمال کي فروغ ڏيڻ گهرجي. اسان محفوظ ماحول جي لاءِ ڪوششون ڪري رهيا آهيون ته جيئن اسان پنهنجي ماڻهن جي لاءِ سازگار ماحول مهيا ڪري سگهون. هن چيو ته موجوده دور ۾ ان ڊيجيٽل اسپيس تي تمام گهڻو ڌيان ڏيڻ جي ضرورت آهي، ان حوالي سان اسان پرعزم آهيون. گوگل ۽ ٽيڪ ويلي صحيح وقت ۾ صحيح قدم کنيو آهي. هن چيو ته آئون انهن صحافين کي به خراج تحسين پيش ڪريان ٿو جن مشڪل حالتن ۾ پنهنجا پيشيواراڻا فرض سرانجام ڏنا. هن چيو ته اسان کي قانون جي عملداري جي لاءِ پنهنجو آواز اٿارڻ گهرجي، اسان کي قومي سلامتي، موسمياتي تبديلي، صنفي برابري سميت ٻين ايشوز تي ڪم ڪرڻ گهرجي.

مضمون کا ماخذ : ہرکیولس اور پیگاسس

متعلقہ مضامین